សៀមរាប៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានប្រកាសថានឹងរៀបចំមន្ទីរពេទ្យនៅតំបន់រុនតាឯកជាមន្ទីរពេទ្យកម្រិត១ សម្រាប់ព្យាបាលពលរដ្ឋដែលរស់នៅទីនេះ ខណៈពលរដ្ឋនឹងកើនឡើងដល់ ៦ពាន់នាក់។
ការសម្រេចនេះធ្វើឡើងនៅក្នុងពិធីជួបសំណេះសំណាលជាមួយ ប្រជាពលរដ្ឋនៅតំបន់១ និងតំបន់២ នៃរមណីយដ្ឋានអង្គរ ដែលបានស្ម័គ្រចិត្តមករស់នៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប នាព្រឹកថ្ងៃទី០៨ ខែធ្នូ ឆ្នាំ២០២៣។
សម្តេចធិបតីថ្លែងដូច្នះថា៖ «យើងនឹងអាចដំឡើងពេទ្យទៅជាកម្រិត១ យើងអាចនឹងរៀបចំ និងស្នើសុំពេទ្យមកបន្ថែមទៀត រៀបចំជូនដល់ប្រជាពលរដ្ឋនៅទីនេះ»។
បើតាមសម្តេចធិបតី មន្ទីរពេទ្យនៅទីនេះនឹងមានគ្រូពេទ្យជាង ៤០នាក់បន្ថែមទៀត ខណៈបច្ចុប្បន្នមន្ទីរពេទ្យមួយនេះមានគ្រូពេទ្យចំនួន ១២នាក់ ហើយសម្តេចធិបតីបានប្រកាសផ្តល់ក្របខណ្ឌដល់គ្រូពេទ្យដែលស្ម័គ្រចិត្តមកព្យាបាលនៅទីនេះចំនួន ៨នាក់។
សម្តេចធិបតី អំពាវនាវដូច្នេះថា៖ «បើក្របខណ្ឌហើយ សូមកុំផ្លាស់ចេញណា សូមជួយ (ពលរដ្ឋ) នៅរុនតាឯកឱ្យបានយូរ»៕